Lipad Ng Pangarap

PAUNANG SALITA:

Ang inyong nasaksihan ay mga kakilala, kaibigan, kaibigan ng mga kaibigan, at mga blogerong nasa iba’t-ibang panig ng mundo. Sinadyang hindi tukuyin ang buong pangalan para na rin sa kanilang kapakanan. Ang bawat litrato ay may pahintulot ng may-ari. Binigyan din ang bawat isa ng link upang kanilang masaksihan ang video na ito.

Maraming salamat sa mga kaibigang nagbigay ng larawan.

Ang awiting inilapat ay pinamagatang LIPAD NG PANGARAP sa panulat ni ARIEL DE PANO. Ang tinig naman ni CHARICE PEMPENGCO ang inyong narinig. Ito ay kanyang aktuwal na inawit sa Little Big Star.

Charice Pempengco @Little Big Star video courtesy of youtube
LIPAD NG PANGARAP lyrics

Milyun-milyong Pilipino ang nasa ibang bansa. Nakikipagsapalaran doon kahit sa murang edad. Hindi alintana kung ano mang panganib ang nakaabang, ang importante ay ang kanilang mga mahal sa buhay. Ngunit, ano nga bang buhay mayroon sa abroad? Ano o sino ang isang OFW? Anong mayroon ang isang OFW at nakakayanan niya ang lahat? Bakit patuloy syang lumiLIPAD para sa kanyang PANGARAP?

Hindi biro ang mangibang bansa. Sa paglapat ng paa mo sa bansang pinili, magsisimula na ang pakikibaka mo. Sa paghahanap ng trabaho, ng bahay, sa pagpili ng pagkain, damit, at iba pa. Iniisip ng iba na madali ang buhay-abroad dahil nga naman kumikita ka ng mas malaki. Hindi nila naiisip kung anong buhay mayroon ang isang OFW. Ang Pinoy Expats/OFW ay ang mga taong nagsakripisyo at mas piniling mangibang-bansa para sa pamilya. Tinawag na BAYANI ng ating gobyerno dahil sa mga dolyares na ipinapadala sa bansa na malaki ang naitutulong upang iahon ang ating ekonomiya.

Pag-asa ng Bayan silang maituturing dahil hindi sila magiging pasanin o pabigat pa sa ating gobyerno. Alam naman natin ang sitwasyon ng ating ekonomiya, dahil sa gobyernong magulo pa sa alon ng dagat ang pagpapatakbo kung kaya’t nagiging kulang ang suporta sa mamamayang Pilipino, dahilan upang ang ilan ay mapilitang mangibang-bansa para mapunuan ang kukulangan sa buhay at nang ang mga pangarap ay mas madaling makamtan. Sa bawat padala nila, nagkakaron ito ng ambag sa pagtaas ng antas ng ekonomiya ng bansa.

Marahil nagtataka kayo kung anong lakas mayroon ang isang OFW. Anong kapangyarihan ang kanilang taglay dahil nga naman hindi biro ang lumaban sa lungkot at pangunglila sa pamilyang naiwan. Likas sa isang Pilipino ang pagiging maka- Diyos kaya unang-una sa lahat na panlaban ay ang dasal at pananalig sa Poong Maykapal, na nagbibigay at gumagabay sa pamilyang naiwan sa Pilipinas, gayun din ang hiling sa karagdagang tibay ng puso at isipan para sa pakikibaka sa banyagang lugar. Ang pamilya, na maituturing nilang bisig ng lakas upang ang kanilang pangarap ay makamtan. At hindi mawawala ang mga kaibigan na nandyan lagi sa tabi hindi lamang upang magpasaya sa oras ng mga kalungkutan kundi sila ring tagapagbigay payo sa mga problema. Ang lahat ng mga ito ang nagbibigay lakas, buhay at pag-asa sa isang OFW upang ipagpatuloy ang laban. Na kahit anong unos ang dumating na dala ng panahon, hinding-hindi bibitaw at patuloy na kakapit. Kahit ilang beses mang madapa o masugatan, babangon pa rin. Hindi susuko kahit gaano pa katindi ang lungkot at pangungulila sa pamilya. Taas-noong haharapin ang bawat hamon. Hanggang sa dumating ang panahon ng muling pagtapak sa bansang sinilangan. Maririnig ang salitang “mabuhay” at “maligayang pagdating” mula sa pamilya at kaanak na naiwan. Masisiil ng yakap na kay tagal nang ninais madama. Ang halik sa noo na may ilang taong hinintay. Ang mga ngiti at luhang natural na pumapatak mula sa mga maliligayang mata. Kaysarap namnamin ng pagkakataong ganoon kung paanong ituring na BAYANI ng sariling pamilya.

Bilang isang OFW, madami na akong nakitang mga kababayan natin na patuloy na nakikipagsapalaran hindi lamang dito sa Dubai kundi sa buong mundo. Tinatahak ang mabatong landas hanggang sa marating ang patag na daan…daan para sa maayos, matiwasay, tahimik at masayang buhay. Dahil kahit saan mang panig ng daigdig dalhin ang isang Pinoy, nakikilala tayo sa angking sipag, talino at tiyaga. Ipinapakita ang talentong mayroon at taas noong sinasabing: “Ipinagmamalaki kong ako ay Pilipino”.

_________________________________________________________

kung inyo pong nagustuhan ang entry na ito, click the link here to vote! ENTRY no. 8 (Wit's Expression, Dubai, UAE) po ang gawa kong ito.

Salamat.